មន្ទីរសន្តិសុខវត្តបារាយណ៍ជាន់ដែកនៅភូមិភាគកណ្តាល

ដោយ ទ្រី សុជាតា

វត្តបារាយណ៍ជាន់ដែក ស្ថិតនៅភូមិត្រស់ ឃុំបល្ល័ង្ក ស្រុកបារាយណ៍ ខេត្តកំពង់ធំ។ នៅក្នុងសម័យខ្មែរ ក្រហម វត្តនេះត្រូវបានប្រើប្រាស់ជាមន្ទីរសន្តិសុខមួយក្នុងភូមិភាគកណ្តាល និងត្រូវបានកំណត់ជាទីតាំង ឧក្រិដ្ឋកម្មនៅក្នុងសំណុំរឿង ០០៤ នៃតុលាការខ្មែរក្រហម។

យោងទៅតាមបទសម្ភាសន៍របស់មជ្ឈមណ្ឌលឯកសារកម្ពុជាជាមួយអ្នកនៅរស់រានមានជីវិតពីមន្ទីរសន្តិសុខនេះបានឱ្យ ដឹងថាមានមនុស្សប្រមាណ ២០០០ នាក់បានស្លាប់នៅក្នុងវត្តនេះ ដោយសារការធ្វើទារុណកម្ម និងការសម្លាប់។ សាកសពជាច្រើននៃជនរងគ្រោះត្រូវបានកប់នៅក្នុងបរិវេណវត្តនេះ។ បន្ទាប់ពី របបខ្មែរក្រហម បានដួលរលំឆ្អឹងរបស់ជនរងគ្រោះត្រូវបានគាស់ពីចេញពីរណ្តៅប្រមាណ២០០កន្លែង ហើយប្រមូលទុកនៅក្នុងវត្ត។ ហើយក្រោយមកប្រជាជននិងអង្គការ ក្រៅរដ្ឋាភិបាលដែលបានទទួល ជំនួយពីមូលនិធិអន្តរជាតិបានកសាងបូជនីយដ្ឋានមួយនៅក្នុងវត្តដើម្បីរក្សាឆ្អឹងរបស់ជនរងគ្រោះទាំងអស់ដែលបានស្លាប់ក្នុងរបបខ្មែរក្រហម។

ក្តារព័ត៌មានបង្ហាញពីទីតាំងឧក្រិដ្ឋកម្មប្រឆាំងនឹងការប្រល័យពូជសាសន៍នៅក្នុងវត្តបារាយណ៍ជាន់ដែក។

ចេតិយនេះត្រូវបានគេយកធ្វើជាកន្លែងរក្សាទុកឆ្អឹងជនរងគ្រោះក្នុងសម័យខ្មែរក្រហម។

ឈ្មោះជនរងគ្រោះមួយចំនួនដែលបានស្លាប់ក្នុងសម័យខ្មែរក្រហមត្រូវបានសរសេរលើក្តារព័ត៌មាន មួយនៅ ចេតិយរក្សាទុកឆ្អឺងជនរងគ្រោះពីសម័យខ្មែរក្រហមក្នុងវត្តបារាយណ៍ជាន់ដែក។

គំនរឆ្អឹងជនរងគ្រោះក្នុងសម័យខ្មែរក្រហមដែលគេដាក់ក្នុងចេតិយ។ ប្រភព៖ ទស្សនាវដ្តីស្វែងរកការពិត លេខ១ ខែមករា ឆ្នាំ២០០០ ទំព័រទី១៤ ចេញផ្សាយដោយមជ្ឈមណ្ឌលឯកសារកម្ពុជា