ព្រះបរមរាជវាំង
ដោយ ការីនិពន្ធ
នៅក្នុងសម័យខ្មែរក្រហម ព្រះបរមរាជវាំងនៅតែបម្រើការជារាជដំណាក់សម្រាប់ព្រះរាជវង្ស និងសម្តេចព្រះ នរោត្តម សីហនុ ដែលនាពេលនោះទ្រង់នៅជាព្រះប្រមុខរដ្ឋរបស់រដ្ឋាភិបាលកម្ពុជាប្រជាធិបតេយ្យ រហូតដល់ខែមេសា ឆ្នាំ១៩៧៦។ ព្រះអង្គគង់នៅក្រោមការឃុំឃាំងនៅក្នុងបរិវេណព្រះបរមរាជវាំងអស់រយៈពេលប្រមាណ៣ ឆ្នាំរហូតដល់ចុងឆ្នាំ១៩៧៨ នៅពេលដែលទ្រង់ត្រូវបានផ្លាស់ឱ្យទៅគង់នៅក្នុងវីឡាមួយនៅពីក្រោយវត្តបទុមវតី។
ព្រះបរមរាជវាំងក៏ជាកន្លែងដែលមេដឹកនាំខ្មែរក្រហមនាំភ្ញៀវប្រតិភូបរទេសមកទស្សនាក្នុងអំឡុងទស្សនកិច្ចរបស់ពួកគេផងដែរ។ នៅក្នុងរូបថតមួយសន្លឹកក្នុងចំណោមរូបថតជាច្រើនដែលរកឃើញដោយមជ្ឈមណ្ឌលឯកសារកម្ពុជា គេឃើញខ្មែរក្រហមបាននាំភ្ញៀវប្រតិភូចូលទស្សនាវត្តព្រះកែវមរកតនៅក្នុងព្រះបរមរាជវាំង៕
